الفاتورة الذكيّة.. والمواطن الأهبل..!!

ذاتَ طَفَرٍ إلكترونيّ.. وأنا قاعد أقزقز بزر (شحدة من الدكنجي) وأسحب نفساً من سيجارتي الرديئة.. سمعتُ خَبَراً طيّر ضبّان عقلي..!! قال إيش..؟؟ الفواتير صارت تشتغل عَ الذكاء الاصطناعي..!! آه والله..!!

زمان.. كان الجابي ييجي يدقّ الباب.. نطفّي الضو.. وننبطح عَ الأرض.. ونقول للأولاد: ولا نَفَسْ..!! ويفكرنا الجابي مش بالدار أو متنا من الجوع.. فـَ (يفكح) ويكتب عَ الفاتورة (غير موجود).. وننفد بريشنا أكمّن يوم..!! أمّا هسّة.. فالفاتورة صارت ذكيّة.. أذكى منّي ومنك ومن إللي خلّفونا..!!

قالوا لي إنّ العدّاد الذكي صار يشمّ عَرَق المواطن من على بُعد عشرة كيلو..!! يعني إذا فكّرت (مجرّد تفكير) إنّك تشغّل الصّوبة أو تحمّي إبريق الشاي المْطَعْوَجْ.. الذكاء الاصطناعي بيلقط الفكرة وهي في نخاع مخّك قبل ما تتحوّل لكهربا.. ويشمطك فاتورة مستعجلة على الخلوي مع رسالة ناعمة تقول لك: (تِسْلمْ لي هالنيّة.. ادفع يا روح أمّك قبل ما نقطعها عنّك بلمسة شاشة..!!)..!!

شو بدكو بطول السالفة.. تسلبدتُ إمبارح بالليل.. ورحتُ على ساعة الكهربا الذكيّة إللي معلّقة عَ الحيط.. فنجلتُ عيوني فيها وجحرتها جحرة واحد مْشَعْلِلْ.. وقلت لها بصوت واطي: اسمعي يا بنت الحلال.. أنا مواطن (ملبّي عَ الأصلي).. وبجيبتي فِشْ ولا إللي ترنّ.. مشان الله استعملي ذكاءك مع الحيتان وانسيني هالشهر..!!

ما كدتُ أُنهي جملتي.. حتّى زغرت الخلوي بجيبتي..!! فتحتُ الرسالة وإذ بها من الذكاء الاصطناعي نفسه يقول لي: (تمّ رصد محاولة استعطاف غير قانونيّة.. وعليه تمّت إضافة خمس ليرات بدل «وجع راس»..!! )..!!

يا جماعة الخير.. المشكلة مش في الذكاء الاصطناعي.. المشكلة إنّ الخازوق صار رقميّاً و(ديجيتال) ويجيك عَ البارد المستريح بدون ما تشوف الجابي وبدون ما تتشحطط بالطوابير..!!

يلعن أبو الذكاء إللي ما شاف غير جيبتي المخزوقة يتشاطر عليها.. ورحم الله أيّام الجابي أبو كشرة.. عَ الأقل كان الواحد يقدر يلطشه بوعد كذّاب.. أمّا هاظ الرّوبوت ابن الحلال.. فـَ يا تدفع.. يا تاكل هوا وتنطمّ بالألوان وبأعلى دقّة..!!