الدكتور محمد الهواوشة يكتب
زمان كنا نزعل إذا الحكم أخطأ ونقول يوم إلك ويوم عليك. أما اليوم صار كثير من الناس يحسوا إن النتيجة كأنها انطبخت قبل ما تبدأ.
بصراحة ثقة الناس بالفيفا صارت تهتز. وإحنا بزمن الـVAR والكاميرات من كل زاوية والذكاء الاصطناعي، ومع هيك لسا بنشوف قرارات بتخلي الواحد يحك راسه ويقول: معقول... عينك عينك؟!
ولما الناس تسمع عن تدخلات وضغوط سياسية أو تشوف جدل كبير حوالين قرارات مصيرية، طبيعي تسأل: هاي كرة قدم ولا سياسة؟ هاي بطولة عالم ولا لعبة مصالح؟
أما التحكيم لحاله قصة. فصار عند كثير من الجماهير علامة استفهام كبيرة. لما الأخطاء تتكرر بنفس الاتجاه، الناس بطلت تقتنع إنها مجرد صدفة، وبتبلش تشك إن في إشي أكبر من مجرد خطأ حكم.
ولهيك بحكي للمغرب: العبوا برجولة وحاربوا لآخر دقيقة، لكن لا تستغربوا إذا حسيتوا إنكم بتلعبوا ضد أكثر من خصم. المشكلة اليوم مش بس بالمستطيل الأخضر، المشكلة بثقة الناس باللي بيديروا اللعبة.
*هسه خلونا من الفيفا شوي ونرجع للأردن.*
كل يوم بنسمع حكي عن محاربة الفساد وعن الشفافية وعن سيادة القانون. والله الحكي حلو... بس المواطن شبع حكي.
آخر قصة وزير العمل أكبر مثال. الوزير استقال، وبعدها مباشرة طلع وزير ثاني يحكي للناس: كل الإجراءات كانت قانونية. طيب إذا كل إشي قانوني، ليش استقال؟ وإذا الاستقالة كانت بمحلها، ليش كل هالتبرير؟
المواطن صار يحس إنه المسؤولين بيدافعوا عن بعض أكثر ما بدافعوا عن مصلحة البلد. وكل ما تطلع قضية بنسمع نفس الأسطوانة: ما في مخالفة... ما في فساد... كل إشي قانوني... وبعدين بتنتهي القصة وكأنها ما صارت.
يا دولة رئيس الوزراء...
إذا أكبر مؤسسة رياضية بالعالم صار الجدل حواليها يوصل لدرجة إن ملايين الناس صاروا يحكوا إن الفساد صار عينك عينك وفي وضح النهار، فكيف بدك المواطن الأردني يقتنع إنه الفساد عنا تحت السيطرة، وهو كل يوم بشوف المسؤولين بوقفوا مع بعض وببرروا لبعض وبحاولوا يقنعوا الناس إن كل إشي تمام؟
محاربة الفساد مش بالمؤتمرات الصحفية ولا بالتصريحات ولا بالشعارات. محاربة الفساد بتبلش لما المواطن يشوف مسؤول كبير يتحاسب قبل ما يطلع مسؤول ثاني يدافع عنه، ولما يصير القانون فوق الجميع مش فوق الضعيف بس.
الناس ما بدها تسمع، الناس بدها تشوف. بدها تشوف القانون ماشي على الكبير قبل الصغير. يومها بس رح يصدق المواطن إن في حرب حقيقية على الفساد، مش مجرد كلام للاستهلاك الإعلامي.
*وبالأخير... انثروا الميرمية على الجبال حتى ما يقولوا المواطن الأردني مات ممغوص من كثرة ما سمع عن محاربة الفساد وما شاف منها إلا التصريحات.*
-
-
استقالة البكار وشجاعة الرئيس ؟2026-07-06 -
-
-
